PUPUH SINOM (NGOTONIN/6 SASIH)
OLIH : I KADE RADIANA
1.
GENG AMPURA ATUR TITYANG
MAJENG RING HYANG PRAMA KAWI
ANTUK LINTANG KETAMBETAN
KIDUNG NIKI DASAR BHAKTI
RERAMBANGAN WAU NGAWI
SINOM ANGGEN DASAR KIDUNG
RIKALANING NANGUN YADNYA
MAOTONAN KAWASTANIN
DRESTA BUGBUG
SWARAN KIDUNG MAUTAMA
2.
OM BRAHMA WISNU ISWARA
SURYANIN RARENE NIKI
SANE JAGI KOPACARA
PAOTONAN KAWASTANIN
INDIK DINA SANE NAMPI
SAMPUN TELUNG DASA WUKU
MOGI POLIH DIRGAYUSA
TALER RAHAYU KEPANGGIH
MANGDA SADHU
TURMANING GURU SUSRUSA
3.
OM DEWA KUMARA JAYA
SUECANIN RARENE MANGKIN
MANGDANE DADOS SUPUTRA
MARERAMA BHAKTI TUWI
BHAKTI RING DEWA LAN WIDHI
DUMOGI SIDA RAHAYU
DREDA BHAKTI ATUR TITYANG
MAJENG OM KUMARA SIDHI
SEMBAH ATUR
DUMOGI IDA MASUECA
4.
UPAKARA PIOTONAN
RING BUGBUG MANGKIN BACAKIN
SATE RAMBYAK LAN PAJEGAN
PANYEGJEG PENGAMBE MISI
DAPETAN MIWAH PEJATI
TAPAKAN PANUMBAS RAMBUT
TALER WENTEN SARWA JANGAN
MIWAH RUNTUTANYA SAMI
BANTEN KATUR
YANING KIRANG AMPURAYANG
5.
NGAWILANGIN INDIK DINA
DEDINANE SANE MANGKIN
DINA RARE MAOTONAN
MOGI KADI PANGASTITI
MEWAT KAWAT TULANG BESI
MANGDA SIDA LANTANG TUUH
NEMU RAHAYU SUKERTA
TALER WICAKSANA LUIH
RARE IPUN
MOGI POLIH KASUKERTAN
PUPUH SINOM
UPACARA MA’SIH BUGBUG
OLIH : I KADE RADIANA
1.
PURUN TITYANG NGARAUHANG
MALARAPAN ANTUK BHAKTI
PARINDIKAN NUTUG YADNYA
PANGELANTUR RING SANG KALIH
NYUJUR MANAH PACANG MA’SIH
YADNYA MANUT DRESTA BUGBUG
NGIRING MANGKIN TELATARANG
SADURUNGE KEKAWITIN
SWASTIASTU
CIHNA ATUR PANGAKSAMA
2.
SUKSEMAN MA’SIH PUNIKA
NING NIRMALA BERSIH SUCI
SANE MANGKIN KOPACARA
PAMEKASNE RING SANG KALIH
CIHNA BUKTI DADOS SIKI
KASUKERTAN NE KATUJU
STATA ELING RING SWADHARMA
NGEMARGIYANG TATA TITI
SARENG NYUJUH
SESANANE DADOS TUA
3.
MANGDA DANGAN NYANGGRA YADNYA
PRAWARTAKA NE JANGKEPIN
NGISI GAE LAN JAUMAN
SAYA MIWAH NGISI NASI
PUNIKA SANE MUCUKIN
NGELAH GAE PATUT MATUR
MANGDA ANTAR LABDA KARYA
PENYANGGRANE SAKING WARIS
SUKSMA ANTUK
MAJENG SAMI NYAMA KANCA
4.
JAUMAN PALING KELIHA
NGISI GAE NYAMA TUNGGIL
NE ALITAN DADOS SAYA
NGISI NASI NYAMA ISTRI
SAKING WARANG SAYA SIKI
KAAPTI SAMI SUMUYUB
PADA GIRANG NYANGGRA KARYA
CENIK KELIH LANANG ISTRI
MANGDA ADUNG
PARAS PAROS SARPANAYA
5.
UPAKARA MANGKIN WILANG
YANING UPACARA MA’SIH
SATE RAMBYAK LAN PAJEGAN
PENGAMBE SAMPUNANG LALI
GEDANG KETANGKEP DAGINGIN
BAYU PATURON MASUDUK
PEJATI MIWAH TAPAKAN
KADAGINGIN SOROH SUCI
PURA BUGBUG
SAYUT PAIDER ELINGANG
6.
OM BRAHMA WISNU ISWARA
SWECANIN MARING SANG KALIH
KENTEN TALER PARA PUTRA
SANE SAMPUN JANGKEP NGAKSI
MOGI SAMI LUIH SIDI
TURMANING SIDA RAHAYU
KAPAICA DIRGAYUSA
GEMAH RIPAH LOH JINAWI
SIDA ANUT
SWADHARMANING KAURIPAN
7.
IDA SANG HYANG WIDHI WASA
SURYA RADITYA MENGAKSI
DUH HYANG GURU HYANG KAWITAN
SEMBAH BHATARA BHATARI
TALER BHATARA LELANGIT
MOGI SAMI IDA ASUNG
NGLUNGSUR PAHAYU UTAMA
MALARAPAN KARYA MA’SIH
TUNAS LUNGSUR
DIRGAHAYU DIRGAYUSA
8.
NIKA WANTAH RERAMBANGAN
NYARITAYANG KARYA MA’SIH
JANTEN AKEH SANE KIRANG
MOGI SIDA KEJANGKEPIN
AMPURAYANG ANTUK SISIP
DASAR BHAKTI ANTUK KIDUNG
SINOM KAANGGEN NGENDINGANG
KASWARAYANG MANGDA SANTIH
SANTIH ATUR
PANGAKSAMA KAPING UNTAT